| 2 
| 236 
yanditswe na Ernest Ndayisaba
Minisitiri MUSONI James
Imiryango nyarwanda itegamiye kuri Leta ntiyemera kimwe ibyavuye mu igenzura ryakozwe na MINALOC ifatanije n’ikigo cy’igihgu cy’imiyoborere myiza RWANDA GOVERNANCE BOARD, ndetse ntibanemera zimwe mu ngingo z’itegeko rigenga imitunganirize n’imikorere by’imiryango nyarwanda itegamiye kuri Leta, nk’ingingo yo gutanga imisoro n’amahoro.
Minisiteri y’ubutegetsi bw’igihugu yo ivuga ko hashingiwe ku byavuye mu bushakashatsi n’igenzura yakoze, yasanze hari imiryango nyarwanda itegamniye kuri Leta idakora neza, bityo bategura itegeko rizashyira imikorere yabo mu buryo.
Ibi byose ni ibyagaraye mu nama MINALOC yagiranye n’abahagarariye imiryango nyarwanda itegamiye kuri Leta, inama yabereye i Kigali kuri uyu wa kabiri tariki ya 15 Gicurasi.
Usibye kungurana ibitekerezo, ku mikoranire ya Leta n’imiryango nyarwanda itegemiye kuri Leta, ni ukuvuga sosiyete sivile n’imiryango mpuzamahanga, MINISITERI y’ubutegetsi bw’igihugu ifatanije n’ikigo cy’igihugu cy’imiyoborere RGB, bamurikiye iyo miryango ibyavuye mu igenzura ryakozwe ku mikorere y’imiryango nyarwanda itegamiye kuri Leta,no kubamenyesha itegeko rishya rizajya rigena imiterere n’imikorere by’iyo miryango.
Gusa ariko bamwe mu bayoboye imiryango nyarwanda iteragamiye kuri Leta, banenze ibyavuye muri ubwo bushakashatsi, nko kuba ubwo bushakashatsi bunenga imiryango muri rusange ntibugaragaze umubare w’idakora neza, cyangwa ikora nabi.
Ku itegeko rishya, abagize imiryango nyarwanda itegamiye kuri Leta, ntibumva neza zimwe mu ngingo nko kwishyura imisoro n’amahoro nyamara ngo societe civile ari umufatanyabikorwa wa Leta.
Minisiteri y’ubutegetsi bw’igihugu yakoze iryo genzura ivuga ko ibyarivuyemo nta nenge ifite.Minisitiri Musoni James avuga ko n’ubwo hagaragayemo kunenga cyane hari n’ibyiza isuzuma rivuga, cyakora anashimangira ko mu miryango nyarwanda itegemiye kuri Leta hari ibitagenda kandi bikwiye gukosorwa.
Ku bijyanye na zimwe mu ngingo z’itegeko zanenzwe nko kwaka imisoro societe civile, Minisitiri Musoni James yasobanuye ko minisiteri ayoboye izabahuza na Rwanda Revenue ngo bigire hamwe imisoro basonerwa n’impamvu indi misoro yatangwa.
Kubera ko ibyavuye mu igenzura byagaragaje ko imiryango imwe n’imwe ikora nka baringa, minisiteri y’ubutegetsi bw’igihugu ibinyujije mu kigo cy’igihugu cy’imiyoborere RGB yashyizeho uburyo bushya bw’ikoranabuhanga rya interinet buri muryango wose uzajya ukoresha mu kwiyandikisha no guhabwa ibyangobwa.
Richard Dan IRAGUHA
Umuryango.com
